30.8 C
Skopje

Bekteshi: ESM-ja ofron rrymë elektrike për Kosovën në këmbim të thëngjillit

Ministri i Ekonomisë në Maqedoninë e Veriut, Kreshnik Bekteshi, ka folur rreth arritjes së një marrëveshjeje për shkëmbim energjetik për blerjen e një sasie të thëngjillit nga Maqedonia e Veriut në Kosovë, e në këmbim të kësaj, Kosova të furnizohet me rrymë.

Bekteshi, në “Info Magazine”, deklaroi se kanë përcjellë ofertën konkrete tek autoritetet kosovare, njofton Klankosova.tv.

“Gjatë takimit, në kuadër të temave, të cilat u diskutuan, me siguri që ne si Maqedoni e Veriut e kemi përgatitur edhe një ofertë konkrete, të cilën ua kemi dorëzuar autoriteteve në Republikën e Kosovës sa i përket rritjes së bashkëpunimit në sektorin energjetik dhe pikërisht njëra ndër kërkesat kryesore është edhe furnizimi i Maqedonisë së Veriut me thëngjill nga ana e Kosovës”.

Bekteshi deklaroi se ESM-ja ofron rrymë elektrike për Kosovën në këmbim të thëngjillit nga KEK-u.

“Në shkëmbim të marrëveshjes dhe detajeve teknike mes dy kompanive shtetërore, ESM-së dhe KEK-ut, ku Kosova të përfitojë nga furnizimi me energji elektrike nga Republika e Maqedonisë së Veriut, duke marrë parasysh që për momentin problemi kryesor te ne është eksploatimi i thëngjillit”, tha Bekteshi.

“Kërkesa e Maqedonisë së Veriut është tre milionë tonë në vit për nevojat e termoelektranës së Manastirit dhe asaj të Osllomenit dhe në shkëmbim të saj të furnizojë Republikën e Kosovës dhe nevojat e KEK-ut me energji elektrike, të cilat do t’i prodhojnë në tri blloqe”.

Tutje, ministri tha se Kosovës do t’i ofrohet rrymë me çmime, të cilat do të mbulojnë vetëm harxhimet operative dhe njëkohësisht edhe çmimet, të cilat për momentin janë shumë më të lira se në  tregjet evropiane.

Marketing