Në ditën e parë të punës, drejtori i ri i Fondit për Sigurim Pensional, Nikolla Memov ka urdhëruar që, të gjitha dokumentet që duhet firmosur dhe që dalin nga kabineti i tij, të jenë vetëm në maqedonisht. Thënë ndryshe, nga sot e tutje ndalet praktika që edhe gjuha shqipe karshi maqedonishtes, të figurojë në dokumentet e FSP-së, shkruan gazeta KOHA.
“Ju informojmë se në pajtim me vendimin e Këshillit Drejtues, për drejtor në FSP është emëruar Nikolla Memov dhe lutemi që të gjitha dokumentet që përgatiten bga ana e shërbimeve të kenë emrin e tij dhe të jenë në maqedonisht dhe në alfabetin kirilik”, thuhet në njoftimin që kabineti i Memovit i ka nisur shërbimeve të FSP-së.
Veç eliminimit të gjuhës shqipe në dokumentet e FSP-së, Memovi “kërcënon” punonjësit që të respektojnë Rregulloren e punës pa përjashtim, ndërsa shërbimet dhe Njësitë rajonale të FSP-së të kenë kujdes me evidencat nëse punonjësit e respektojnë orarin e punës.
“Në të kundërt, do ketë kontrolle të shtuara dhe secili mosrespektim i orarit të punës do të sanksionohet ashpër, ndërsa përskaj punonjësit, do ketë përgjegjësi edhe për udhëheqësin e sektorit”, thuhet në urdhrin e parë të drejtorit të ri në FSP, Nikolla Memov.
Në ndërkohë, deri sot, pjesa më e madhe e dokumenteve, bazuar në Ligjin për përdorimin e gjuhëve dhe Rregulloren e punës së FSP-së, dokumentet zyrtare ishin në dy gjuhë – në maqedonisht dhe shqip, praktikë kjo mesa duket, nuk do të ekzistojë më.
Ndryshe, Nikolla Memov ka qenë në poste zyrtare në kohën e pushtetit të LSDM-së, por me ndarjen e Maksim Dimitrievskit nga LSDM, Memov kaloi me partinë ZNAM. (koha.mk)
