Iniciativa 8/ Osmani: Investojmë në projekte kapitale sipas politikave të BE-së dhe forcojmë bashkëpunimin rajonal

Takimi ministror i sotëm shënon fillimin e Iniciativës 8, e cila përveç lidhjes së transportit dhe energjisë përgjatë Korridorit 8, do të shërbejë edhe si platformë politike që do të sigurojë avancimin e bashkëpunimit të ndërsjellë dhe intensifikimin e shkëmbimit politik, ekonomik dhe të sigurisë, shkëmbimin kulturor si dhe atë social ndërmjet Maqedonisë së Veriut, Italisë, Bullgarisë dhe Shqipërisë.

Këtë e theksoi Ministri i Punëve të Jashtme i RMV-së, Bujar Osmani, në konferencën e sotme për media në Brindizi të Italisë, ku së bashku me ministrat e punëve të jashtme të vendeve që janë pjesë e këtij bashkëpunimi, Antonio Tajani, Maria Gabriel dhe Olta Xhaçka i prezantuan konturet kryesore të kësaj iniciative.

“Bashkëpunimi i ngushtë me dy shtetet anëtare të Bashkimit Evropian, Italinë dhe Bullgarinë, ka rëndësi të madhe për ne dhe për Shqipërinë si vende kandidate sepse do të ketë implikime pozitive. Kjo iniciativë është edhe në drejtim të asaj që ne si shtet angazhohemi, për më shumë integrim para anëtarësimit, respektivisht për përfshirjen e vendeve kandidate në politikat dhe iniciativat përkatëse të BE-së, që do t’u mundësojë qytetarëve t’i shfrytëzojnë përfitimet nga anëtarësimi gjatë gjithë procesit, dhe jo vetëm pas përfundimit të tij”, tha Osmani në konferencën e përbashkët për media me ministrat e punëve të jashtme të vendeve që janë pjesë e Iniciativës 8.

Kjo iniciativë e përbashkët, tha Osmani, duhet të shndërrohet në një aleancë të re në rajon, e cila do të ofrojë bashkëpunim strategjik më të thellë dhe më domethënës për vendet përmes promovimit të vlerave evropiane, evropianizimit të përgjithshëm të të gjithë rajonit dhe vendosjes së mirëkuptimit të përhershëm, besimit mes popujve tanë, bashkëpunimit politik dhe rritjes ekonomike.

“Maqedonia e Veriut mund të luajë rol kyç në përmirësimin e lidhjes fizike në rajonin që lidh perëndimin dhe lindjen. Puna e përbashkët e qeverive tona mund të mundësojë që shumë shpejt të kemi korridor transporti përmes të cilit do të jetë e mundur që për 10 orë të mbërrihet nga porti i Italisë në Detin Adriatik deri në portin e Bullgarisë në Detin e Zi. Tani kjo rrugë zgjat 25 orë.” – tha Osmani.

Madje, Ministri Osmani Iniciativën 8 e inicoi në fillim të vitit 2021 si ide për platformë të re multidisiplinare ndërmjet Maqedonisë së Veriut, Bullgarisë dhe Shqipërisë përmes së cilës do të intensifikohej dhe thellohej bashkëpunimi i ndërsjellë, si interes strategjik për shtetet që janë pjesë e iniciativës.

Krahas kësaj, Osmani në Brindizi i prezantoi projektet më të reja të infrastrukturës në Maqedoninë e Veriut përgjatë Korridorit 8 të Rrjetit të Transportit Trans-Evropian drejt Bullgarisë dhe Shqipërisë, si dhe zhvillimin paralel të infrastrukturës përgjatë Korridorit 10, projekte që mund të shërbejnë si katalizator për bashkëpunimin rajonal dhe përpjekjet për integrim.

Ministrat e Punëve të Jashtme u dakorduan se do të mbajnë takime të rregullta dhe njëkohësisht do të punojnë në forcimin e bashkëpunimit, jo vetëm mes qeverive, por edhe mes qyteteve nëpër të cilat kalon Korridori 8. Nisma do të përfshijë biznesin dhe shoqërinë civile si një nga faktorët kryesorë për zbatimin e bashkëpunimit të suksesshëm.