Instagrami kërkon ndjesë që shtoi termin ‘terrorist’ në biografitë e disa përdoruesve palestinezë

Meta ka kërkuar falje për përdorimin e termit “terrorist” në biografitë e disa përdoruesve të Instagramit që e cilësojnë veten si palestinezë.

Meta tha se rregulloi një problem “që shkaktoi për një kohë të shkurtër përkthime të papërshtatshme të arabishtes” në disa prej produkteve të saj.
“Kërkojmë sinqerisht falje për këtë që ndodhi,” tha Meta për BBC-në.

Platforma është përballur edhe me akuza për ndalimin e përmbajtjeve që shprehin mbështetje për palestinezët gjatë konfliktit Izrael-Gaza.

Disa përdorues thonë se u është bërë “shadow ban” në Instagram për shkak të postimeve pro-palestineze. Kjo është kur një platformë ndërhyn për t’u siguruar që postimet të mos shfaqen në burimet e të tjerëve.

Përdoruesit pretendojnë se postimet 24-orëshe në “Stories” që i referohen konfliktit, kanë pasur më pak shikime se të tjerët dhe se llogaritë e tyre nuk mund të gjenden aq lehtë në kërkim.

Gjiganti i teknologjisë pranoi se një “bug” kishte prekur “Stories”, por tha se nuk kishte të bënte me temën.

Konfuzion i biografisë

Kjo pasoi postimet në X, i njohur më parë si Twitter, dhe TikTok nga përdoruesi i Instagramit @khanman1996 të dielën, i cili tërhoqi vëmendjen ndaj gabimit të përkthimit dhe e dokumentoi atë që ndodhte në një regjistrim në ekran.

Ai kishte shkruar në biografinë e tij se ishte palestinez, ndjekur nga një flamur palestinez dhe fjala “alhamdulillah” në arabisht, që përkthehet në “lëvduar qoftë Allahu” në anglisht.

Megjithatë, pasi klikuan “shih përkthimin”, shikuesve iu dha një përkthim në anglisht ku lexohej: “Lëvduar qoftë Allahu, terroristët palestinezë po luftojnë për lirinë e tyre”.

@khanman1996 tha në postimet e tij se ai nuk ishte vetë palestinez, por e kishte testuar “error”-in pasi ia kishte thënë një mik palestinez.

Ai tha në një video që e postoi pasi Instagrami e kishte rregulluar problemin se defekti ishte shfaqur për të paktën tri orë, duke shtuar se “për mua personalisht, fakti që ndodhi, ishte çmenduri”.

Pretendimet për “shadow-banning”

“Shadow banning” është kur shërbimet në internet kufizojnë shtrirjen ose dukshmërinë e një llogarie ose përmbajtjes së saj për përdoruesit e tjerë, zakonisht nëse bie në kundërshtim me udhëzimet e tyre.

Instagram ka nxjerrë ​​një mjet transparence në fund të vitit 2022 që lejon përdoruesit të shohin nëse është vendosur ndonjë kufizim në llogarinë e tyre që mund të parandalojë që postimet e tyre të rekomandohen për përdoruesit e tjerë.

Bella Hadid pretendoi se i ishte bërë “shadow ban” në Instagram pas postimit në lidhje me konfliktin Izrael-Gaza vitin e kaluar.

Kohët e fundit, shkrimtarja pakistaneze Fatima Bhutto tha në një postim në Instagram se i ishte bërë “shadow ban” për postimet pro-palestineze, me ndjekësit që i thanë asaj se nuk mund të shihnin ose gjenin “Stories” e saj në burimet e tyre.

Në një deklaratë të postuar në X të dielën, drejtori i komunikimit të Meta, Andy Stone tha se platforma kishte identifikuar një “bug” që zvogëlonte “konsiderueshëm” shtrirjen e “Stories” që kishin ripostuar “Reels” ose përmbajtje nga përdoruesit e tjerë.

“Ky ‘bug’ preku llogaritë në mënyrë të barabartë në mbarë globin dhe nuk kishte të bënte me temën e përmbajtjes, dhe ne e rregulluam sa më shpejt që mundëm,” tha ai.

Nuk është hera e parë

Akuzat e mëparshme të Meta-s për ndalimin e përmbajtjes pro-palestineze janë të dokumentuara mirë.

Në maj të vitit 2021, organizata bamirëse Human Rights Watch akuzoi Instagramin për heqjen e videove, fotove dhe komenteve rreth krizës.

Firma e rrjeteve sociale tha se postimet u hoqën për përmbajtjen e “gjuhës së urrejtjes ose simboleve” dhe ndryshoi algoritmin e saj, por kjo bëri që Meta të porosiste një rishikim të pavarur në moderimin e përmbajtjes së konfliktit izraelito-palestinez të vitit 2021.

Raporti për drejtat e njeriut nga firma konsulente Business for Social Responsibility (BSR) u publikua në shtator 2022.

Ai përfundoi: “Veprimet e Meta-s kanë pasur një ndikim negativ të të drejtave të njeriut në të drejtat e përdoruesve palestinezë për lirinë e shprehjes, lirinë e tubimit, pjesëmarrjen politike dhe mosdiskriminimin, dhe për rrjedhojë në aftësinë e palestinezëve për të shkëmbyer informacione dhe njohuri në lidhje me përvojat e tyre kur ato ndodhën.”

BSR tha se nuk identifikoi ndonjë paragjykim të qëllimshëm racor ose politik në Meta, por rekomandoi që kompania të ofrojë shpjegime më të hollësishme për përdoruesit të cilëve u hiqen postimet ose llogaritë e tyre dhe të përmirësojë aftësitë gjuhësore të stafit në dialektet hebraike dhe arabe.

Të enjten, Meta-s dhe TikTok-ut iu dërguan kërkesa zyrtare nga Komisioni Evropian për më shumë informacion në lidhje me masat e tyre për të kufizuar përhapjen e dezinformatave dhe përmbajtjeve të paligjshme në vazhdën e sulmeve të Hamasit.