Sot në Shkup u promovua loja më e famshme në botë “Monopoli”, e cila së shpejti do të ketë edicionin e vet në gjuhën maqedonase. Kjo lojë prestigjioze dhe ndërkombëtare është deri tani loja më e shitur në botë me mbi 290 milionë kopje të shitura, e dizajnuar në 44 gjuhë dhe e pranishme në më shumë se 113 vende, dhe sot Maqedonia bëhet pjesë e familjes globale dhe ka nderin të jetë pjesë e këtij projekti me famë botërore. Në takimin e sotëm me mediat iu drejtua përfaqësuesja zyrtare për “Monopolin në Maqedoninë e Veriut” znj.Julinda Gega Hoxha dhe Z. Gzhegozh Levinski (Grzegorz Lewiński), përfaqësues nga kompania angleze “Winning Moves”, një partner i licencuar për edicionet shtetërore të Monopolit nga Hasbro, si themelues i lojës në Shtetet e Bashkuara, në vitin 1935. “Monopoli ka krijuar deri tani edicione të ndryshme anembanë botës, duke përfshirë në shumë vende të rajonit si Kroacia, Serbia, Sllovenia, Mali i Zi, Kosova dhe Shqipëria. Tani Maqedonia ka mundësi t’i bashkohet hartës botërore, jo vetëm të shteteve rajonale, të cilat tashmë kanë krijuar edicionet e tyre të Monopolit, por edhe të atyre evropiane dhe botërore. Për të arritur këtu, ishte një sfidë e madhe për të tërhequr vëmendjen e kompanisë „Winning Moves“. Pas një numri të takimeve dhe diskutimeve, ne po u mundësojmë të gjithë fëmijëve nga Maqedonia, së bashku me familjet e tyre, të luajnë lojën prestigjioze dhe ndërkombëtare në gjuhën e tyre amtare për herë të parë. Ne jemi shumë të lumtur dhe të privilegjuar që kemi qenë në gjendje të bëjmë një projekt të tillë tërheqës për Maqedoninë”, tha Gega Hoxha.
Edicioni „Monopoli Maqedonia” ka një qëllim kulturor, historik, tregtar dhe arsimor përmes lojës interaktive dhe shoqërisë. Njerëzit, jo vetëm nga Maqedonia, por nga e gjithë bota do të kenë mundësi të mësojnë më shumë për bukuritë natyrore, monumentet kulturore dhe historike dhe pamjet e çdo qyteti në Maqedoni, më në fund për trashëgiminë kulturore të vendit tonë. Në të njëjtën kohë, përmes këtij projekti, qëllimi është promovimi i turizmit të Maqedonisë në mbarë botën. Me këtë projekt, synimi është të risocializojmë njerëzit, të “ndërtojmë” një frymë të shëndetshme konkurruese, të kalojmë në mënyrë produktive kohën e lirë dhe të krijojmë kujtime të reja. Loja shoqëruese është një përpjekje për të rianimuar jetën sociale përmes një loje edukative, humane dhe argëtuese shoqërore, e cila synon të na ribashkojë dhe të kontribuojë për të kaluar momente të këndshme dhe të ngrohta së bashku. „Ne jemi dëshmitarë se teknologjia moderne jo vetëm që po na izolon nga jeta reale dhe nga ndërveprimet fizike të njëri-tjetrit, por kohët e fundit ka qenë një „shpatë me dy tehe“, veçanërisht për adoleshentët të cilët po kalojnë një periudhë delikate dhe të trazuar në jetën e tyre – pubertetin. Ky është një moment i zjarrtë kur do të donim të vlerësonim rëndësinë e një procesi të shëndetshëm shoqëror dhe të ri-inxhinieronim vlerat dhe bindjet shoqërore, veçanërisht në shtëpitë e prindërve. Ideja është të bashkojmë familjet për të kaluar më shumë kohë duke u argëtuar dhe duke u shoqëruar me njëri-tjetrin, dhe në të njëjtën kohë, t’u japim prindërve mundësinë për t’i larguar fëmijët e tyre nga telefonat dhe teknologjia”, tha Levinski.
Monopoli Maqedoni do të dalë në shitje deri në fund të vitit 2023. Një ngjarje e madhe do të organizohet për të promovuar dizajnin e edicionit maqedonas të Monopolit. Ky produkt do të jetë në dispozicion në vende të ndryshme, të tilla si qendrat tregtare, libraritë dhe dyqanet e lodrave në të gjithë Maqedoninë. “Ne si partnerë të „Winning Moves“ do t’u mundësojmë qytetarëve të Maqedonisë të votojnë për përmendoret dhe monumentet kulturore. Përmes kësaj fushate, ne do të përfshijmë qytetarët që të jenë pjesë e këtij projekti të madh, sepse loja është për ta”, theksoi Gega Hoxha.