Sveçla: Pjesëtarët e Njësive Speciale që protestuan sot, kanë të hyra mujore mbi 2,200 euro

Ministri i Punëve të Brendshme Xhelal Sveçla, ka reaguar pas protestës së njesive elitare të Policisë së Kosovës.

Përmes një shënimi në Facebook, Sveçla ka thënë se Kosova është vend shumë i varfër dhe ka buxhetin më të vogël në Evropë.

“Republika e Kosovës është vend i varfër dhe me buxhetin më të vogël në Evropë. Por, Republika e Kosovës është e themeluar mbi sakrificën e luftës për liri, me akte heroike dhe humbje në njerëz. Mbrojtësit e Republikës sot janë njerëzit më të vlerësuar prej popullit të Kosovës”.

Ai thotë se kërkesat janë të shumta dhe ka kategori shoqërore të cilat kanë shumë vështirësi përgjatë jetesës së tyre.

Ministri i Brendshëm megjithatë thotë se Njësitë Speciale kanë pasur mbështetjen më të madhe financiare nga Qeveria.

“Si Ministri e Punëve të Brendshme, nga 9 agjenci ekzekutive, Policia e Kosovës ka pasur mbështetje dhe fokus të veçantë me qëllim të mobilizimit në luftimin e krimit, kontrabandës, mbrojtjen e integritetit territorial dhe sovranitetit. Nga vetë Policia e Kosovës, Njësitë Speciale kanë pasur dhe vazhdojnë të kenë mbështetjen më të madhe si në aspektin financiar ashtu edhe me ngritjen në strukturë”.

Ai thotë se Njesitë Speciale në fillim të mandatit i kanë gjetur në kushte të vështira.

“Me marrjen e mandatit, pjesëtarët e Njësive Speciale të Policisë së Kosovës i kemi gjetur pa uniforma, pa pajisje mbrojtëse për jetën e tyre, pa kushte të punës e me ushqim të mangët e jo cilësor”.

Nga marrja e mandatit, deri në votimin e buxhetit për vitin 2024, kemi rritje për mbi 30% në buxhetin total të Policisë, përderisa, në investimet kapitale kemi rritje për 300%. Nga viti 2021, buxheti për pajisje operacionale është 21-fishuar. Në vitin 2021, buxheti ka qenë më pak se gjysmë milioni për pajisje operacionale ndërsa këtë vit është mbi 9 milionë euro”.

Duke ju referuar protestës së sotme, Sveçla tha se të ardhurat mesatare mujore të zyrtarëve që protestuan sot janë mbi 2,200 euro.

“Për ne, ka qenë gjithmonë synim përmirësimi i kushteve të punës, sigurimi i pajisjeve që mbrojnë jetën e zyrtarit policor si dhe trajtimi dinjitoz e i drejtë i tyre, teksa për dallim nga kohërat e mëhershme, kur kompensimet për angazhimet shtesë nuk janë zbatuar fare, ne kemi kompensuar ato pa vonesa. Të ardhurat mesatare mujore gjatë këtij viti të zyrtarëve që protestuan sot janë mbi 2.200 euro”.

Angazhimi ynë për shtet dhe forcim të tij do të jetë i pakursyer dhe i pandalshëm me të gjithë ata të cilët përkundër sfidave e kanë vullnetin. Unë falënderoj edhe njëherë të gjithë zyrtarët e Ministrisë së Punëve të Brendshme e veçanërisht të Policisë së Kosovës për angazhimin dhe sakrificën drejt një shteti të drejtë dhe prosperues”, ka shkruar Sveçla./Telegrafi/

https://www.facebook.com/100063788556625/posts/pfbid02Ck4YYjwDsAofRxXWpr1crL3Y9binfPVMMxLXcVazpgauiVWTLgR5X87MKwRvEGWVl/?mibextid=cr9u03